Sekslə bağlı təxəyyülü içinə alan bənzətmələrdən biri İsa Məsihlə kilisə arasındakı münasibətlərin İncildəki təsvirində işlədilir. Ümumiyyətlə, Bibliyada qeyri-cinsi münasibətləri, hadisələri və s. anlatmaq üçün istifadə edilən cinsi münasibət/seks metaforu, bənzətməsi bir qayda kimi açıq, birbaşa yox, dolayı verilir. Başqa sözlə, seksual münasibətlərin motiv kimi əsasında durduğu bütün bənzətmələrdə seksual münasibəti də içinə alan başqa bir sosial institutdan, ənənədən, davranış və ilişkidən söhbət gedir.
Bunlara misal olaraq nikah - evlilik, fahişəlik, xəyanət, bakirəlik, sünnət və s. bu kimi motivləri göstərmək olar. Sözügedən təcrübə və rituallar özləri çılpaq seks olmasa da seksual münasibətləri içərən və ya buna yönəlik sosial əlaqələr, adət və ənənələrdir.Buna səbəb odur ki, Müqəddəs Kitabda mücərrəd, içtimai münasibətlərdən və dəyərlərdən kənarda var olan seks yoxdu. Seks hər zaman bir geniş kontekstlə əlaqədədi: ya evlilik, ya fahişəlik, ya nikah, ya insest, ya da başqa bir şey. Kilisə və İsa Məsih arasındakı münasibətin seksual motivli bənzətmələrlə anladılması da bu kontekstdə görülməlidi. Bibliyaya görə, Kilisə İsa Məsihin nişanlısı, sevgilisi, gəlinidi. Bu mənada İsa Məsih bəy və ya ər, kilisə isə qadın, gəlin, sevgilidi. Özü də elə-belə qız deyilmiş Kilisə. Həvari Paulos bir də onun bakirəliyinə işarə edir. Kilisə İsa Məsihlə qovuşmağın həsrətini çəkir. İsa Məsih ikinci gəlişində sevgilisini almaq üçün təşrif buyuracaq. Alıb hara gedəcək, neyniyəcək...bu haqq-hesab artıq sizin təxəyyülünüzə, inancınıza qalıb. İncillərə görə, İsa Məsih Kilisəni sevir və Kilisə üçün yerə gəlib: bu anlamda Kilisə Məsihə inanan bütün insanları bildirir. Gəlin/nişanlı – bəy/sevgili bənzətməsi digər qeyri-cinsi münasibətləri də ifadə etmək üçün işlədilir.
No comments:
Post a Comment