Sabah Pasxa bayramıdı.
Hamınızın bayramı mübarək! Pasxa bayramında xristianlar Allahın Oğlu İsa Məsihin dirilməsini qeyd edirlər. İsa Məsihin ölməsi və dirilməsi xristianlığa görə tarixi (yəni önəmli), faktiki (yəni görülən və bilinən) və dini (yəni inanca, İlahiyə aidiyyəti olan) bir hadisədi.
Diriliş hadisəsinin Xristianlıqda bir çox şərhləri var. İncillərə görə, İsa Məsihin dirilməsi ilə insanlıq tarixində yeni bir mərhələ başlayır və bəşəriyyətin İlahiyə gedən yolunda önəmli dəyişiklik olur. Onun ölümündə günahlar bağışlandığı kimi, Onun dirilməsində də yeni həyat başlayır və bütün inananlara müjdə verilir. İsa Məsihdə yaşamaq əbədi həyat, Tanrı hüzurunda yaşamaq deməkdi.
Məsihin dirilməsi elə öz dönəmində də ağlasığmaz, qeyri-adi bir hadisə kimi görünübmüş. İncillərə görə, həvari Toma gözümlə görüb əlimlə onun yaralarına toxunmayana qədər inanmayacağam deyərək Onun dirilməsi haqqında şahidlərin söylədiklərinə inanmamışdı. İncillər vurğulayır ki, İsa Məsih bədəncə dirilib, yəni sadəcə bir ruh kimi insanlara görünməyib, çarmıxdan öncəki halıyla bədənli, yaraları da üstündə olmaqla insanlar görünüb və onlarla yemək yeyib və Tomaya onun yaralarına toxunmasına izn verib (bu həmin həvari Tomadır ki, sonra Hindistana gedir və orda Mar Toma kilisəsinin əsasını qoyur.)
Ancaq O dirildi. Biz də onunla birlikdə, həvari Pavlosun öyrətdiyi kimi, yeni həyatı yaşamaq üçün dirildik.
Rəbbdə yaşayın.
