Xətasız Qul Olmaz və ya Davudla Betşebanın Hekayəti

Bibliyada keçən maraqlı hekayələrdən biri padşah, peyğəmbər və şair (ənənənin doğru söylədiyini qəbul etsək) Davudun günahkarlığı, loru dillə desək, oğraşlığı və əclaflığı haqqındadı.

Davud tarixi şəxsiyyət olub. İsrailliləri öz ətrafında birləşdirib güclü dövlət qurmağı bacarıb, Bibliyaya görə, şeirlər-ilahilər yazıb, hələ musiqi alətləri də icad edib. Davud həm də qorxmaz olub. Bibliyaya görə, Davud heç kimin təkbətək döyüşməyə cürət etmədiyi nəhəng Qoliyatı öz sapandı ilə öldürüb. Davud hamımızın adını eşitdiyi Süleyman peyğəmbərin (və padşahın) atasıdı. Davud Rəbbin seçdiyi bir insanmış.

Amma Davud həm də bütün insanlar kimi günahkar olub. Dərinə getmək istəyən özü oxuyar, mən qısaca və ümumi şəkildə nəql edim. Davudun bir vəfalı döyüşçüsü varmış. Həmin döyüşçü Davudun ordusu ilə səfərdəykən Davud padşahın bunun arvadına, Batşebaya, gözü düşür (detallarını Bibliyadan oxuyun). Arvadı yanına gətirir, yatağına salır, üstündən bir müddət keçəndən sonra Batşeba buna hamilə qalması xəbərini göndərir. Bəs Davud nə edir? Qoşun başçısına xəbər göndərir, həmin döyüşçünü geri gətizdirir, ona qulluq edir, sonra da evinə göndərir ki, döyüşçü dincəlsin, arvadının qoynuna girsin, bir az rahatlansın. Başqa sözlə zibilinin ört-basdır etməyə çalışır. Ancaq döyüşçü padşahın ona bu qədər etimadından, hörmət göstərməsindən sonra evə gedə bilmir, minnətdarlıq hissi onu necə çulğalayırsa, elə sarayının qapısı ağzında yatır. Davud təkidlə onu evinə göndərməyə çalışır, ancaq döyüşçü də cavab verir ki, hər kəs döyüşdəykən mən evdə yata bilmərəm. Davud da eləmə tənbəllik ordu başçısına möhurlü məktub yazır və həmin məktubda da sərkərdəyə tapşırır ki, bu döyüşçünü savaşın ən qızğın yerinə göndərin və sonra da onu orda yalnız buraxın, qoy düşmənləri öldürsün. Sonra da həmin məktubu elə o döyüşçünün öz əliylə ordu sərkərdəsinə göndərir. Uzun sözün qısası, Davudun dediyi kimi edirlər və həmin döyüşçü savaşda öldürülür. Bundan sonra Davud Batşebanı evinə gətirir və özünə arvad edir. Davudun ondan bir oğlu olur.

Davudun bu əməli Allahın xoşuna getmir.  Rəbb Natan peyğəmbəri göndərib onu qınayır və cəza kimi uşağın həyatını alır.

Davud bütün günahlarına baxmayaraq İlahini sevən birisi olub və bizə bəlli olmayan səbəblərə görə, İlahi də onu bərəkətləndirib. Bu hekayət ürəyiniz istəyən qədər sual çıxarır. Allah Davudu niyə seçsin ki? Davudun öldürtdüyü döyüşçünün haqqı necə oldu bəs? Bu sualları uzatmaq olar, cavab tapmayacaqsınız, arxayın olun.

Bu hekayətən nə nəticəyə gəlmək sizə qalıb, ancaq hər kəsi günahına görə qınayanda, Allahla insan arasındakı münasibətin düzünəqulu olmadığını da xatırlayın. Ürəkləri bilən sadəcə Odur.