İsa Məsihin
kimliyinə və həyatına dayanan təlimin məqsədi haqqında Bibliyada bəzi mülahizələrə
rastlanılır. Bu ideya və mülahizələrdən birinə bu gün nəzər salacağıq. Sözünü
etdiyimiz fikirləri bilmək həm Bibliyanın şərhi, həm də onu inanc gözüylə
oxumaq üçün önəmlidir. Bibliya, daha öncə bəhs etdiyimiz kimi, mürəkkəb
kitabdır və istənilən ideyanı dəstəkləmək üçün ondan sui-istifadə etmək
mümkündür. Buna səbəb Bibliyada bir çox ideya və hadisələrdən və bir çox
perspektivdə danışılmasıdır. Bundan başqa Bibliyadakı janr rəngarəngliyi onu şərh
etdiyimiz zaman əsas məqsədi gözdən qaçırmaq ehtimalını artırır. Belə
yanlışlığın baş verməsi ehtimalını azaltmaq üçün Bibliyanı inanc gözüylə nə
üçün oxuduğumuzu bilməliyik.
Pavlosun
Timoteyə yazdığı birinci məktubda (1 Tim. 1:5) məsihi təliminin məqsədi
haqqında ideyalardan biri açıqlanır. Orada deyilir ki, “Bu əmrin məqsədi pak ürəkdən,
təmiz vicdandan və riyasız imandan gələn məhəbbətdir.” Cümlədəki “Bu əmrin...”
söz birləşməsi İsa Məsihin insanlara verdiyi və sonradan onun həvarilərinin
yaydığı təlimə istinad edir. Qısaca desək, Bibliyanı inanc gözüylə oxumaqda məqsəd
İlahinin köməyiylə bütün yaradılışa qarşı özümüzdə İsa Məsihin etdiyi kimi bir
sevgi, məhəbbət gəlişdirməkdir. Həmin sevgi müəyyən özəllikləri olan imandan, ürəkdən və vicdandan qaynaqlanır və həmin özəlliklər də Müqəddəs Ruhun bizi İsa Məsih yolunda Ona doğru və Ona uyğun dəyişməsindən ortaya çıxır. Bu, əlbəttə, aysberqin sadəcə görünən tərəfidi,
çünki sözügedən sevgi ideyası İsa Məsihin fədakarlığı, Ən Böyük Nəsihət (Allahı
sev, qonşunu sev), Əhdi Ətiqdəki qanun və qurtuluş doqması ilə sıx bağlıdır və
onları anlamağı tələb edir.
Ancaq məncə
elə bu qədərini bilmək də Bibliyanı və məsihi təlimini anlamağa az da olsa
yardım edir. Əgər Bibliyanı oxuduqdan sonra insanlara, heyvanlara qarşı daha rəhmli
davranmağı qərara alıb buna uyğun davranırsınızsa, və ya belə davranışı öz
prinsipiniz halına gətirirsinizsə, deməli Bibliyadan yazıldığı məqsədə uyğun nəsə
ala bilmisiniz. Ancaq Bibliyanı ateist kimi oxumaq olar və ya onu oxuyub oradan
nifrət, qarğış kimi fikir və ideyaları qabartmaq və bundan da öz acığını, nifrətini
dəstəkləmək üçün yararlanmaq olar. Bu cü yanaşma, həvari Pavlosun öyrətdiyinə
görə kitabı inancdan başqa məqsəd üçün oxumaq kimi bir cəhddən
qaynaqlanır. Odur ki, Bibliyanı
oxuduğunuzda onu niyə və necə oxuduğunuzu xatırlayın.
No comments:
Post a Comment